وقفة أدبية مساجلة بين المخطار ولد هدار وابنه باب

جمهورنا العزيز ، زوار موقعنا ، منتسبي مجموعات صوت الشعب و محبي الأدب الحساني أخترنا الليلة أن نقف مع مساجلة أدبية جرت بين المخطار ولد هدار وابنه باب ونضعها بين أيديكم كعيدية خاصة لمتابعي وزوار موقع صوت الشعب وكذا أعضاء مجموعاته.

ولاهي نتكلم بالحسانية وهي بدأت ذيك الساعة عند امنين اخلك التقري، و عدل المختار ول هدار قرية ف ابليدة و عدل فيها احريثة و عاد امكسمها اعل اعيال، اياك كل حد منهم يتسًعْ، واعط منها برزه ابعيدَ من الحاس أُلا فيه شى ل ولُ باب، وعاد دائمن إهَدٌو عنو لاه إولِ فيها

عاد باب إكول

هدار امكسم ذا التكسامْ @@@ الحرث التكسام إلِ عــامْ
ذاك إلِ فات اُدَشَنْ كــامْ @@@ بيه ابِيه ءُلا حصرُ بيـــهْ
إلِ حاظر والِ فاوهـــأمْ @@@ الحاسِ هَيِين اتسَــوْكيـهْ
طاه ألْـمُحمد فال اتْحَامْ @@@ ـرْامع فيه ابيه احواشيهْ
الزر إلٍ متوَلٍ لخيــــامْ @@@ طاه ءُزَرُ لوخر عاطيــــهْ
ءُُزَرُ هو فيه وَلْجَــــــامْ @@@ الزيرَ وآن ريت اكصِيــهْ
وابلا عمال اُفي عـــامْ @@@ اُمحتاج انرَ زاد ادًوغيـهْ
الْ شِي إجِ فيه ءُلَتٍسَاعْ @@@ وآن مانِ عجلان اعليـهْ
اُلانِ صايبلُ والَ كــاعْ @@@ زاركولُ لا ولَ فيــــــــــهْ

و المختار كان مهاب فاولاد، وكان الى كالولهم شى الا اعدلوه، و دائمن لين اتعود فم امرَضعيفه الا اكول ل حد من اولادو عن يكفلها ( اعدل امعاها ابلد ) و باب اعدل ذاك يغير الا مايطول حت وعاد المختار يختيرامعنيلُ اعل ذاكُ

عاد ايكول المختار

حرثِ كسمتُ حك اُكَــــالْ @@@ باب عنٍ كسمتُ اُجــــــــــالْ
كاع إبان فْذاك المجــــالْ @@@ ونٍ فضلتْ اعليـــه ابٍـــــــيهْ
فيه ءُكيفُ محمد فــــــالْ @@@ وابن العم ء ُذاك تْوَدٍيــــــــهْ
فالكسمَ قراينْ لحــــــوالْ @@@ ءُ هـاذ لاهِ زاد امَعنــــــــــيهْ
مزلت لبابَ مولَ عْيــــالْ @@@ والحرث ءُ حاسيه اتلوصيهْ
فيهم شِيات امن ازكـــالْ @@@ مريتُ فالطلعَ اســاميـــــــــهْ
والعمل واخلاص العمالْ @@@ جولَ ذاك اشلُ بِجوليـــــــــهْ
وامع ذ غريب ءُعجيـبْ @@@ الٍ ماطيتولُ ســـــاويــــــــــهْ
والا حـدًنُ لاهِ اجــــــيبْ @@@ فيه اتزكنينَ واخليــــــــــــــهْ